मानसिक आणि मेंदूच्या आजारांवर आता अत्याधुनिक उपचार; अशोका मेडिकव्हरमध्ये नवी सुविधा सुरू

मेंदूच्या विशिष्ट भागांना चुंबकीय स्पंदनांद्वारे उत्तेजित करणारे आधुनिक तंत्रज्ञान; स्ट्रोक, मेंदूच्या दुखापतीनंतर पुनर्वसन, पार्किन्सन्स आजार, नैराश्य, मायग्रेन तसेच काही न्यूरोलॉजिकल आणि मानसिक आजारांसारख्या समस्यांसाठी उपचारांचा नवा पर्याय

(प्रतिनीधी समाधान शिरसाठ)

नाशिक :- मेंदूचे आरोग्य आणि मानसिक स्वास्थ्याशी संबंधित आजारांच्या उपचारांना आधुनिक तंत्रज्ञानाची जोड देत अशोका मेडिकव्हर हॉस्पिटल, नाशिक येथे अत्याधुनिक आरटीएमएस न्यूरोमॉड्युलेशन सेंटर सुरू करण्यात आले आहे. या केंद्रातील आधुनिक यंत्रणेद्वारे मेंदूतील विशिष्ट भागांना नियंत्रित चुंबकीय स्पंदनांच्या साहाय्याने उत्तेजित केले जाते. शस्त्रक्रिया न करता आणि मेंदूमध्ये कोणतेही उपकरण प्रत्यारोपित न करता केली जाणारी ही उपचारपद्धती, योग्य रुग्णांमध्ये मेंदूच्या कार्याशी संबंधित काही आजारांच्या उपचारांसाठी महत्त्वाचा पर्याय ठरू शकते.

आरटीएमएस (Repetitive Transcranial Magnetic Stimulation) तंत्रज्ञानामध्ये डोक्याच्या बाहेरील बाजूने दिल्या जाणाऱ्या चुंबकीय स्पंदनांच्या माध्यमातून मेंदूतील विशिष्ट मज्जापेशींच्या कार्यावर परिणाम केला जातो. उपचारादरम्यान मेंदूच्या निवडक भागांना लक्ष्य करता येत असल्याने,रुग्णाच्या आजारानुसार उपचारांचे नियोजन करता येते.स्ट्रोकनंतरचे पुनर्वसन आणि काही न्यूरोलॉजिकल आजार, मेंदूच्या दुखापतीनंतर पुनर्वसन, पार्किन्सन्स आजार,नैराश्य,चिंता,मायग्रेन व दीर्घकालीन डोकेदुखी, दीर्घकालीन वेदना,झोपेचे विकार, व्यसनाधीनता तसेच काही मानसिक आजारांसारख्या स्थितींमध्ये तज्ज्ञांच्या तपासणीनंतर या उपचारपद्धतीचा विचार केला जाऊ शकतो.न्यूरोलॉजिस्ट डॉ. विशाल सावळे यांनी सांगितले की,“मेंदूशी संबंधित आजारांचा परिणाम व्यक्तीच्या शारीरिक आरोग्यासोबतच भावनिक स्वास्थ्यावर आणि दैनंदिन जीवनावरही होतो. आरटीएमएस हे आधुनिक तंत्रज्ञान मेंदूतील विशिष्ट भागांना चुंबकीय स्पंदनांद्वारे उत्तेजित करून त्यांच्या कार्यावर परिणाम करण्यासाठी वापरले जाते. या उपचारपद्धतीचे वैशिष्ट्य म्हणजे शस्त्रक्रियेची आवश्यकता नसते आणि मेंदूमध्ये कोणतेही उपकरण बसवावे लागत नाही. योग्य रुग्णांमध्ये, विशेषतः नैराश्याच्या काही प्रकारांमध्ये तसेच निवडक न्यूरोलॉजिकल समस्यांमध्ये,याचा उपयोग होऊ शकतो.मात्र प्रत्येक रुग्णाची लक्षणे, वैद्यकीय इतिहास आणि आजाराचे स्वरूप लक्षात घेऊनच उपचार ठरवणे आवश्यक आहे. नाशिकमध्ये ही अत्याधुनिक सुविधा उपलब्ध झाल्यामुळे रुग्णांना आधुनिक उपचारांचा आणखी एक पर्याय मिळणार आहे.”

आरटीएमएस उपचार सुरू करण्यापूर्वी रुग्णाची सविस्तर वैद्यकीय तपासणी केली जाते. त्यानंतर या उपचारपद्धतीचा लाभ होण्याची शक्यता आणि तिची उपयुक्तता तज्ज्ञांकडून निश्चित केली जाते. आवश्यकतेनुसार औषधोपचार, समुपदेशन आणि पुनर्वसन यांच्यासोबत आरटीएमएसचा वापर केला जाऊ शकतो.अनुप त्रिपाठी,सेंटर हेड, अशोका मेडिकव्हर हॉस्पिटल यांनी सांगितले की, “नाशिक आणि उत्तर महाराष्ट्रातील रुग्णांना आधुनिक वैद्यकीय तंत्रज्ञान आणि दर्जेदार आरोग्यसेवा उपलब्ध करून देण्याच्या दृष्टीने हे केंद्र महत्त्वाचे पाऊल आहे.मेंदूचे आरोग्य आणि मानसिक स्वास्थ्य यांविषयी जागरूकता वाढवतानाच, रुग्णांना योग्य निदान आणि तज्ज्ञांच्या मार्गदर्शनाखाली आधुनिक उपचारांचे पर्याय उपलब्ध करून देण्यासाठी अशोका मेडिकव्हर हॉस्पिटल सातत्याने प्रयत्नशील आहे.”